Müəllim və şagirdlərin nəzərinə: məktəblərdə fotoşəkil çəkmək qadağan edilə bilər (səbəb)
FaktXəbər-in verdiyi məlumata görə, Bakı Şəhər Təhsil İdarəsindən bu qurumun tabeliyində olan bütün məktəblərə foto çəkilişlərini bir şirkətin - "Panoramik" MMC-nin vasitəsilə aparmağı tövsiyə edən məktub göndərilib. Məktubda bildirilib ki, bəzi hallarda təhsil müəssisələrində fotoqrafiya işlərini qeyri-peşəkar şəxslər fərdi şəkildə və baha qiymətə görür, bu da valideyn və şagirdlərin narazılığına səbəb olur. Buna görə məktəb direktorlarına tövsiyə olunub ki, fotoqrafiya işlərinin yüksək səviyyədə, bazar qiymətindən ucuz aparılması üçün bu işləri "Panoramik" MMC vasitəsilə icra etsinlər.
Bu, paytaxt məktəblərində foto işlərinin bir şirkətin inhisarına alınması deməkdirmi? "Media forum" saytı sualı Bakı Şəhər Təhsil İdarəsinin təminat və təchizat sektorunun məsləhətçisi Əli Abdullayevə ünvanlayıb.
Əli Abdullayev bildirib ki, sözügedən məktub əmr yox, tövsiyə xarakteri daşıyır: "Heç kəsi məcbur etmirik ki, hökmən bunu etsin. Məktubu bizə olan şikayətlər əsasında göndərmişik. Dəfələrlə bizə valideynlərdən və müəllimlərdən şikayətlər olub ki, məktəblərdə baha qiymətə foto çəkirlər.
Əgər "Panoramik" MMC fotoçəkilişləri başqalarından ucuz aparırsa, onun xidmətindən istifadə etməkdə nə problem var? Biz bu işləri bir şirkətlə görməyi tövsiyə etməklə inhisar yaratmırıq. Müqayisə etsinlər, əgər "Panoramik" MMC-dən ucuz yerlər varsa, orada şəkillərini çəkdirə bilərlər. Buna etirazımız yoxdur".
"Panoramik" MMC-nin foto çəkilişlərini hansı qiymətlərlə apardığına gəlincə, Əli Abdullayev budan məlumatsız olduğunu söyləyib.
Maraqlıdır ki, hər hansı bir müəllim və ya şagird öz telefon və ya fotoaparatı ilə şəkil çəkmək istəsə həmin MMC-dən icazə və ya lisenziya almalıdırmı?
